DSBE murrizteko proposamena baztertzen dugu

Euskal Herriko Eskubide Sozialen Kartak salatzen du Eusko Jaurlaritzak, babesa ematen dioten alderdien bidez, DSBEren erreforma bat onartu nahi dute, prestazio sozialetan murrizketa berriak egitea eta prestazioak jasotzen dituztenak kriminalizatzea duena helburu moduan.

Eskubide Sozialen Kartak gogora arazten du EAJ eta PSEren lege proposamena, pobrezia eta bazterketa sozialaren aurkako Herri Ekimen Legegilea (HEL) erregistratu ondoren aurkeztu zela.

HEL honetan planteatzen genuen, besteak neurri batzuen artean, DSBEren zenbatekoan hobekuntza bat (LGSren %100 kide bakarrarentzat eta %50 gehiago bizikidetza unitateko pertsona gehigarri bakoitzeko), onartutako murrizketetan atzera egitea (adibidez, urtebeteko erroldatzera bueltatzea eta egun baztertuta dauden kolektiboei sarbidea erraztea (hala nola, adina 18 urtetan jarriz).

51.000 pertsona baino gehiagoren babesa jaso zuen HELak, hala ere, tramitera ere ez zuten onartu, hain zuzen ere EAJ, PSE eta Ppren kontrako botoarekin. Hiru alderdi hauek ados jarri dira lege proposamen baten tramitea onartzeko. Honek DSBEren zenbatekoa ez du Lanbidearteko Gutxieneko Soldatarekin lotzen, prestazio sozialak eskuratzeko eskubidea murrizten du eta babestu egiten du egungo zein etorkizuneko praktikak, prestazioak jasotzen dituztenak ustezko gaizkiletzat jotzen dituztenak, gutxienez bermatutako diru-sarrerak izateko eskubidea duten pertsonen ordez.

Guzti honen aurrean, Eskubide Sozialen Kartak:

1. Dei egiten du DSBEren erreforma murriztailearen tramitazioa baztertzeko.

2. Berretsi egiten da pobrezia eta bazterketa sozialaren kontrako HELen jasotako edukiak onartzeko beharrean.

3. Baieztatu egiten du bere osotasunean babes sozial ereduaren inguruko eztabaidari ekitearen beharra. Horretarako, tresna egokien faltan, beharrezkoa da lan harremanak eta babes sozialerako euskal esparru bat,

4. Bere konpromisoa erakusten du prestazio sozialen murrizketen kontra eta bidezko sistema sozial baten alde mobilizatzen jarraitzeko.

Publicado en Albisteak | Etiquetado , , , | Comments Off on DSBE murrizteko proposamena baztertzen dugu

Durangon maiatzaren 5ean egingo den Herrien Besarkadan parte hartzeko deialdia egin dugu

Bilboko Arriaga plazan elkartu gara gaur, eta Durangon maiatzaren 5ean egingo de Herrien Besarkadan parte hartzeko deia egin dugu.

Ongi Etorri Errefuxiatuak-ekin batera egin dugu gaurko mobilizazioa, aldaketa soziala eskatuz, baita migrazio eta errefuxiatuen inguruko politiketan ere.

Herrien, pertsonen eta giza eskubideen arteko besarkada

Euskal Herriko Eskubide Sozialen Kartak bat egiten du Europako ‘Herrien besarkada’ kanpainarekin, eta dei egiten die herritar guztiei Durangon maiatzaren 5eko 12:00etan Europako beste herriekin batera izango diren ekitaldietan parte hartzera. Kartak Arteako Konpromisoak bere egiten ditu. Horrela:

■ Salatu egiten ditu krisi soziala eta ekonomikoa pertsona migrante eta errefuxiatuen gain jartzen dituen diskurtsoaren manipulazio eta gezurra, Europako eliteen erantzukizuna saihestuz. Europar Gobernuek, Euskal Herrikoak barne, krisia sortu duten politika neoliberal eta antisozialak ezarri dituzte, eta, aldi berean, desberdintasuna, pobrezia eta bazterketa areagotu dituzte.

■ Exijitzen dugu Giza Eskubideen Adierazpen Unibertsala bete dadin, pertsona migranteak askatasun osoaz mugitu eta biztanle europar guztien eskubide berberak izan ditzaten.

■ Egun Europako eskuin muturreko indar neofaxista eta autoritarioek ezarri eta zabaltzen ari diren gorroto eta bazterketa politiken aurka egiteko konpromiso hartzen dugu. Europako bizitza eredutzat humanitatea eta elkartasuna defendatzen ditugu.

Eskubide Sozialen Kartak berariazko deia egiten du baztertutako kolektiboen kontrako politika kriminalak sala daitezen. Eskubide sozialak (ekarpenak barne) murrizteko politikek izaera arrazista eta xenofoboa dute. Karta osatzen dugun eragileek horrelako kanpaina eta politikei aurre egin eta pertsona guztientzako eskubide guztiak defendatzeko konpromiso tinkoa adierazten dugu. Halaber, Euskal Herriko instituzioei exijitzen diegu pertsona migranteen eskubideak modu eraginkorrean bermatuko

duten baliabide guztiak ezarri ditzaten.

Jasaten ari garen eraso neoliberal eta faxistaren aurrean politika sozialak bultzatzea inoiz baino beharrezkoago dugu, soilik horrela lortu daitekeelako eskubide berdineko jendartea, kohesionatua eta, integrazio eta kulturartekotasunean oinarrituta. Horregatik guztiagatik, hauxe eskatzen diogu euskal administrazioei:

■ Enplegurako neurri eta politika publiko eraginkorrak har ditzaten; pertsona migranteen zaurgarritasun eta bereganako bazterketa geldiarazteko, bereziki emakume migranteekin.

■ Alda dezaten egungo marko juridikoa. Dei egiten diegu berariazko harrera baldintzak uztartzeko eskuduntzak exijitu eta beregana ditzaten; gure ekoizpeneta gizarte-egituraren errealitatearen araberakoa eta elkartasun eta nazioarteko laguntzaren ikusmoldetik.

■ Aurrera egin dezaten Europa demokratikoa eta pertsonek eta pertsonentzako helburu eraikitzen. Europa soziala eta herrietako Europa.

Esku artean ditugun erronkak anitzak dira: eraso neoliberala, nekropolitika kapitala metatzeko gisa, kolapso ekologikoa, elkartasuna kriminalizatzea… Horrela, ezinbestekoa da Euskal Herriko sindikatu eta jendarte eragileen artean sareak egituratzea eta baieztatzea, zalantzarik gabe, hemen eta orain alternatibak badaudela erakusteko eta etorkizuneko Euskal Herria eraikitzeko. Langile migranteak ezinbestekoak dira eta, bide horretan, behar-beharrezkoak.

Arteako Adierazpenaren ildotik, humanitatea; pertsona migranteak eta bere mugimendu askea eta harrera; neofaxismoaren aurkako borroka eta abar defendatzen jarraituko dugu. Horregatik, maiatzaren 5ean, guztiok Durangora.

#besarkada

Publicado en Albisteak | Etiquetado , , | Comments Off on Durangon maiatzaren 5ean egingo den Herrien Besarkadan parte hartzeko deialdia egin dugu

Gasteizko Parlamentuak HELari emandako ezezkoaren aurrean, otsailaren 13an kalera aterako gara Bilbon #ILPariBAI #PobreziariEZ

Euskal Herriko Eskubide Sozialen Kartaren ordezkaritza bat Gasteizko Parlamentuan izan da gaur. Izan ere, Parlamentuan eskubide sozialen alde aurkeztu genuen HELaren tramitazioa bozketagai izan da gaur. HEL honek Araba, Bizkaia eta Gipuzkoako 51.000 herritarren babesa jaso zuen, sinadura bidez emandakoa.

Janire Landaluzek babes soziala hobetuko lukeen HELaren defentsa egin du Legebiltzarreko Osoko Bilkuran eta ondoren, alderdiek euren botoa eman dute. Baiezkoa EH Bildu eta Elkarrekin-Podemoseko kideek eta ezezkoa EAJ, PSE eta PPkoek. Hortaz, HEL ez da tramitaziora onartu, aldeko 29 boto jaso dituelako eta kontrako 46.

Botazioaren ondoren, prentsaurrekoa egin dugu Parlamentuan bertan. Bertan, Bea Martxueta eta Janire Landaluzek hartu dute hitza, Euskal Herriko Eskubide Sozialen Kartako hainbat ordezkarik lagunduta.

Adierazi dute 51.000 sinaduren ahotsa ekarri dutela Lege Biltzarrera. “51.000 BAI bestelako babes sistemaren alde eta 51.000 sinadura pobrezia eta bazterketa sozialaren kontra.”

Berriro ere eztabaida era faltsuan itxi dela zehaztu dute. Berriro ere, beste ekimen batzuekin gertatu den moduan, Lege Biltzarrak HEL bati eztabaida publikoa eta demokratikoari ezetza eman diolako.

Gaineratu dute, hemendik aurrera, EAJ eta PSEren lege proposamen murriztatzaileak oztoporik gabeko bidea izanen duela. “Gure HEL neutralizatzeko sortua izan zen lege proposamena, PNV eta PSE babes soziala deseraikitzeko duten helburuaren bidean kokatzen da”.

“Lege Biltzarrak DSBE eta etxebizitzaren inguruan eman beharreko eztabaida publikoa ekiditzearen kontra” agertu eta mobilizaziorako deia egin dute. “Otsailaren 13an Bilbon, giza katea eginen dugu ezezko jarrera izan duten hiru talde parlamentarioen, PNV-PSE-PP egoitzak batuz”. 10:15ean hasiko da mobilizazioa PPren egoitzatik (Gran Via, 87).

Publicado en Albisteak | Etiquetado , , , | Comments Off on Gasteizko Parlamentuak HELari emandako ezezkoaren aurrean, otsailaren 13an kalera aterako gara Bilbon #ILPariBAI #PobreziariEZ

Gasteizko Legebiltzarrari Euskal Herriko Eskubide Sozialen Kartak aurkezturiko Herri Ekimen Legegilearen eztabaidari bide ematea eskatzen diogu

51.000 sinaduren ibilbildearen etorkizuna ostegun honetan erabakiko da. Otsailaren 7ko Lege Biltzarreko Osoko Bilkuraren bigarren puntuan, Euskal Herriko Eskubide Sozialen Kartak aurkezturiko Herri Ekimen Legegilearen (HEL) eztabaidari bide ematen zaion erabakiko da. Aste honetan bertan jakinen dugu gure ekimenaren eztabaida demokratikoa bermatzen den edo ukatua izaten den.

Orain aste bete iragarri moduan, PSE ezik, Lege Biltzarra osatzen duten gainontzeko taldeekin bilera desberdinak egin ditugu: EH Bilduk eta Podemosek bere babesa eman badigute ere, EAJ eta PPrena kontrako zentzuan joan da. Aipatu dugun moduan, PSEk bilera deialdiari erantzun ez badigu ere, Gobernua sostengatzen duen taldea izanik, ezezko jarrera izanen duela aurreikusten dugu. Eta gauzak horrela, berriro ere, babes sozialaren inguruko eztabaida faltsuan ixteko arriskua dago. Are gehiago, gure ekimena eragotziko balitz, EAJ eta PSE-k aurkezturiko lege proposamenaren eztabaidari soilik bide emanen litzaioke.

Babes sozialean hain garrantzizkoa den prestazioa lege proposamen baten bidez aldatu nahi izateak, gobernuaren izaera demokratiko eza agerian uzten du. Are gehiago, horrela tramitatu nahi izanak helburu argia izan du: gure HEL neutralizatzea. Eztabaidaren ibilbide berak hori ondorioztatzera eramaten gaitu. 2017ko maiatzean EAEko Gobernuak bere proposamena aurkeztu zuen 18/2008 legea erreformatzeko. Proposamen horrek “Diru Sarrerak Bermatzeko Errenta hobetzeko oinarrien dokumentua” izan zuen izenburutzat.

Gobernuak, orduan, proposamen horren premia honelaxe justifikatu zuen: Jaurlaritzak “babes sozialeko euskal sistemaren finantziazioa sendotzeko eta bere iraukortasuna bermatzeko, adostasun zabaleko itun soziala bultzatu behar” duela, alegia.

Proposamen hori aurkeztu zutenetik, gaia jorratzen duen legebiltzarreko batzordean hainbat aurkezpen eta agerpen egin izan dira. Kartak ere bertan parte hartu zuen, bere balorazio ezkorra azalduz.

Gauzak horrela eta behin eztabaida zabalduta, Kartak 2018ko martxoan HEL aurkeztu zuen. Horren helburua gaur egungo legeak aldatzea, Diru Sarrerak Bermatzeko Errentaren zenbatekoa duina izan dadin, premia duten pertsona guztiek eskuratu dezaten eta etxebizitza eskubide efektiboa bermatua izan dadin.

Apirilaren 28an Legebiltzarrean EAJk eta PSEk, hasitako prozesu parte hartzailea zartatu zuten lege proposamena aurkeztuz; emandako arrazoia, erreformaren onarpena azkarrago egin behar zela esan zuten, alegia, eztabaida eta bermeak mugatzea besterik ez zuten bilatzen, gai horren inguruan preimiazkoa den adostasun soziala ekidituz.

Lege proposamen horren erreferentzia Jaurlaritzak duela urtebete aurkeztu zuen oinarrien dokumentua da eta, beraz, erreforma neurri berberak dakartza. Neurri horiek bere momentuan hainbat kritika jaso zituzten, gaur egun indarrean dagoen araudiarekin konparatuta DBE murriztera baitatoz. Mugimendu sozialek, gehiengo sindikalak eta aurkeztutako HELak agerpen parlamentarioetan azaldu eta eskatutakoari entzungor egin eta bere momentuan kritikatutako neurriei eutsi diete.

Gauzak horrela, Kartak hurrengo osteguneko osoko bilkuran bere HEL defendatuko du. Kartak, 51.000 sinaduren ahotsa eroanen du Lege Biltzarrera. Kartak hurrenez hurren, bestelako babes sozialaren beharraz, kohesio sozialaren beharraz eta eztabaida demokratikoaren beharraz arituko da lege biltzarrean. Zentzu horretan, Lege Biltzarrari eztabaidari bide ematea eskatzen diogu. Halaber, Eusko Jaurlaritza osatzen duten taldeen izaera antidemokratikoa salatuko dugu eta beraiek aurkezturiko lege proposamenaren kontra agertuko gara HEL neutralizatzeko asmoz sortua izan delako, egungo babesa murrizten duelako are gehiago eta jendartean ireki beharreko eztabaida ekiditzen duelako.

Gaur Bilbon egindako agerraldiaren argazkiak

 

 

Publicado en Uncategorized | Etiquetado , , , , | Comments Off on Gasteizko Legebiltzarrari Euskal Herriko Eskubide Sozialen Kartak aurkezturiko Herri Ekimen Legegilearen eztabaidari bide ematea eskatzen diogu

Kohesio sozialaren bidean Herri Ekimen Legegileari bai

Orain hilabete batzuk, Euskal Herriko Eskubide Sozialen Karta ordezkatzen dugun eragile sozio-sindikalek Herri Ekimen Legegilea martxan jarri genuen. Ekimen horren helburua da egun indarrean dagoen babes sozialaren estaldura zabaltzea, handitzea. Konkretuki bi lege aldatu nahi ditugu: Diru Sarrerak Bermatzeko Errenta (hemendik aurrera DSBE) 18/2008 eta Etxebizitzaren Legea 3/2005.

Datuen arabera gero eta jende gehiagok babesa behar du. Alegia 2008. urtean DSBE jasotzen zutenek 83.023 ziren, populazio osoaren %3,9a. 2016. urtean berriz 134.563 pertsonek jaso zuten prestazioa, populazio osoaren % 6,3. Ikusten den bezala, urte hauetan zehar %62a igo da prestazio hau jasotzen dutenen kopurua.

Tamalez, Eusko Jaurlaritzaren borondate politikoa gutxieneko estaldura eskaintzea da eta horretarako sistema deseraikitzen ari dira azkenengo urte hauetan. Hau da, 2012. urtetik gaur egun arte, %13,5eko murrizketa jasan izan du eskubide horrek. Gainera, Eusko Jaurlaritzaren proposamenaren arabera DSBEn kopuruak 2019rako %30 inguruko murrizketa izanen luke. Norabide horren kontra argi eta garbi azaltzen gara.

HELan agertzen diren horietako aldaketa batzuk aipatzearren: egungo legediak eskubidea eskuratzerako hogeita hiru urteko baldintza ezartzen du; gure proposamenak hemezortzi urte ezartzen ditu; egungo legediak, eskubidea eskuratu ahal izateko, hiru urte erroldatua egotea ezartzen du; gure proposamenak urte betera mugatzen du. Etxebizitzaren Legearen inguruan, etxebizitza eskuratzeko eskubidea kopuru ekonomiko batekin ordezkatua ez izatea eskatzen dugu. Alegia, bai ala bai, etxebizitza eskubidea bermatzea eskatzen dugu.

Proposaturiko aldaketa hauek egikarituko balira gauzak asko aldatuko lirateke, eta orduan bai Eusko Jaurlaritzari hainbeste gustatzen zaion baina aplikatzen ez duen kohesio sozialaz hitz egin genezakeen.

Konkrezio legal hauetaz gain Gobernuak pausuak eman ditzan eskatzen dugu Lan Harreman eta Babes Sozialaren Euskal Esparruaren alde: beharrezkoa baititugu ahalmen horiek eskuratzea gure jendartearen eta produkzio ehunduraren araberako araudiak eraikitzeko.

Gure Ekimen Legegileak 51.000 sinadura lortu ditu; kopuru itzela gure aburuz. 51.000 bai eramanen ditugu Lege Biltzarrera bestelako babes soziala eraikitzeko. 51.000 sinadura bizi baldintzen prekarizazioaren, bazterketa sozialaren eta pobreziaren kontra. 51.000 bai bizitza duinari.

Lege Biltzarrak HEL-ren tramitazioari argi berdea eman bazioen ere, Eusko Jaurlaritzak jada bere kontrako jarrera agertu du. Gainera ezin ahaztu, PNV eta PSEk gure HEL neutralizatzeko asmoz aurkeztutako Lege Proposamena, non DSBEren erreformarako tramitazioa azkartzea duen helburu, inolako adostasun sozial lortu barik eta eduki oso murriztatzaitatzaileekin.

Ondorioz, Euskal Herriko Eskubide Sozialen Kartak Lege Biltzarrari eskatzen dio 51,000 pertsonek sinaturiko ekimenak eztabaida demokratikoa izan dezan bermatzea eta proposaturiko aldaketei argi berdea ematea, bertan proposaturikoak asko hobetuko bailuke, jende andanaren bizitza.

Gaur Bilbon egindako agerraldiaren argazkia.

 

Publicado en Uncategorized | Etiquetado , , , | Comments Off on Kohesio sozialaren bidean Herri Ekimen Legegileari bai