FEMINISTOK BABES SOZIALERAKO SISTEMA PUBLIKO PROPIOAREN ALDE BILBON

Bilboko Eusko Jaurlaritzaren delegaritzaren aurrean Feministok kontzentratu gara gaur. “Zuen murrizketak gure zama” eta “Babes sozialerako sistema publiko eta duin baten alde” lemepean mobilizatu gara. Honako irakurketa hau egiten dugu:

Murrizketak. Murrizketak eta murrizketak. Hori da Eusko Jaurlaritzak, EAEn, pobrezia egoeran aurkitzen diren 69.000 pertsonentzako pentsatu duen irtenbidea. Murrizketak eta pobrezia gehiago.
Maiatzaren 31n Araba, Bizkaia eta Gipuzkoako Enplegu eta Politika Sozialetako Departamenduak prestazio sozialerako sisteman egin zuen erreformaren neurriak iragarri zituen. Neurriok, orain arteko ildoari jarraituz, prestazioak jasotzeko baldintzen gogortzea ekarriko dute.

Azken urteetan etengabea eta oso gogorra izan da babes sozialeko sistemak jasandako erasoa.
• 2012.urteaz geroztik, aurrekontuetan %7ko murrizketa pairatu du.
• Prestazioak eskuratu ahal izateko baldintzen gogortzea
• SMI-aren %8ko igoera Lanbidek kudeatzen dituen jendarte laguntzetan ez aplikatzeko erabaki hartu berrria.

Horrez gain, jakin berri dugunez, RGI-ko erreformaren puntuetako bat izango da etxe bakoitzeko diru- laguntza bakarra eskatu ahalko dela. Erabaki honekin lan baldintza prekarioak dituzten pertsonen etxebizitzarako eskubideak mugatzeaz gain, familia eredu normatiboaren aldeko apustua da, egungo errealitateari ezikusiarena egiten diona eta bizikidetza mota desberdinen aukerak argi eta garbi urratzen dituena.
Murrizketa hauek salatu eta lehengoratzea exigitzeko, apirilaren 1ean Bilboko kaleetan milaka herritar mobilizatu ginen.

Sistemaren etengabeko erasoen salaketari, Beatriz Artolazabalek zuzentzen duen Departamenduak gidaturiko eta hainbat komunikabidek hauspoturiko kriminalizazio kanpaina arbuiatu nahi dugu. Era berean, prestazioak jasotzen dituzten pertsonei haztarna digitala ezartzea ozen salatu behar dugu.

Lan baldintzetan pairatzen ari garen prekarizazio bortitzak, handitu egin du arrakala soziala eta langile pobreen kolektiboa gero eta zabalagoa da. Langile hauek enpleguaren bidez ez dituzte diru-sarrera nahikoak lortzen eta behartuak daude prestazio sozialak eskatzera, ongizate duina bermatu ahal izateko.

Testuinguru honetan, emakumeok gara kaltetunetakoak, gu baikara, adibide bat jartzearren, kontratu partzialak dituztenen %30,8a. Eta emakumeon prekarietate maila altua, langabezia, soldata-arraila (brecha salarial delakoa) eta feminizatutako lanbideen desbalorizazioa gutxi balitz, dohainik egiten dugun lana ezin ahaztu. Gu gara sistema honek funtzionatzeko behar dituen zaintza lanak dohainik egiten ditugunak eta bizirauteko oinarrizko beharrei erantzuten diegunak estatuek bere ardurak betetzen ez dutenean. Horregatik, eskubide sozialetan egiten duen murrizketa bakoitza gure bizkarrean zama handia da.

Ez dugu onartzen. Nekatu gara motxila handi eta pisutsu hauek eramateaz. Babes soziala ez luxua, gure eskubidea da. Emakume langileak gara, lana soberan dugu eta enplegu duina faltan. Eusko Jaurlaritzaren politika antisozialek jendartearen bazterretara eta miseriara garamatzate. Feministok badakigu alternatibak badaudela: bizitza duina eta burujabea ahalbidetuko duen Babes Sozialerako sistema publiko, propio, duin eta kalitatezkoa nahi dugu.

Horrela, Mugimendu Feministako eragileei deia egiten dizuegu ekainaren 22an, 12:00etan, Eusko Jaurlaritzaren aurrean Bilbon burutuko dugun ekintzan parte hartzera eta ekimena bera zabaltzen laguntzera. Ekarri zuen motxilak, zama eraikinaren atean deskargatzera goaz eta.

Bizitza burujabea eskubide osoz!
Murrizketa gehiagorik ez! Pobrezia gehiagorik ez! Gora borroka feminista!

Kategoriak Uncategorized | Erantzunak desaktibatuta daude FEMINISTOK BABES SOZIALERAKO SISTEMA PUBLIKO PROPIOAREN ALDE BILBON sarreran

ESKUBIDE SOZIALEN ALDE KALERA IRTEN GARA ETA KALEAN JARRAITUKO DUGU

Gaur Bilbon eta Donostian kalera irten gara Eskubide Sozialen defentsan eta Babes Sozialerako Sistema Publiko Propioaren alde. Gaur prestazio sozialen erabiltzaileen ahotsa entzun izan dugu, aurretik pentsionistena entzun genuen bezala, eta hurrengo asteetan sindikatuena eta mugimendu feministarena entzungo dugun bezala.

Hauxe da gure irakurketa:

Euskal Herriko Eskubide Sozialen Kartak, Euskal Enplegu Zerbitzuko erabiltzaile eta DSBEaren hartzaileen eskutik, Bilbon, Mazarredoko Lanbideren bulegoen aurrean ondoko irakurketa plazaratu nahi dugu:

Eusko Jaurlaritza osatzen duten alderdiek (EAJ eta PSOE), Alderdi Popularraren babesa bilatu nahian, aurkeztutako Diru Sarrerak Bermatzeko Errentaren erreforma proposamena —15 modifikazio eta 5 normatiba aldaketekin— aurkeztu zuen Enplegu eta Politika sozialetako sailburu den Beatriz Artolazabalek. Neurri hauek laguntza hau jasotzeko bete beharreko baldintzak gogortzen dituzte eta prestazio sozial honi lotutako eskubideak murriztu.

Murrizketa hauen ondorioz pobreziarekin amaitu eta oinarrizko bizibidea bermatua izatea zailduko dute:

• Etxebizitza bakoitzean presazio bakarreko muga ezartzen du, etxebizitza batean bizi diren pertsona guztiak elkarbizikidetasun unitate bakarreko kide bezala kontutan hartzen ditu; nahiz eta odolkidetasun edo harreman afektibo edo familiarrik ez egon. Ez da kontutan hartzen bizikidetasun unitate ezberdinak etxebizitza konpartitzeko beharrean daudela, diru sarrera apalak eta alokairu altuei edo hipotekei aurre egiteko zailtasunak dituzten familia edo pertsonak direlako.

• DSBEren kopurua lan munduaren errealitateko elementuetatik deslotzen da, hala nola Soldata Minimo Interprofesional edo Kontsumo Prezioen Indizetik. Beraz, honen aktualizazioa Auronomia-Erkidegoko aurrekontuak negoziatzen dituzten alderdi politikoen borondateari lotuta egongo da. Eskubide sozialak prekarietatea edo pobrezia egoera pairatzen duten sektore sozial zabal eta askotarikoetatik urrun hartzen diren erabakien menpe egongo dira.

• Murrizketa politikak justifikatzen dira kriminalizazio kanpainen bidez. Hauen helburua kolektibo ezberdinak — sektore sozial prekario edo pobreziari aurre egin edo etxebizitza duina izateko aukera minimo batzuk bermatzearen aldeko (adibidez etxebizitza konpartituz) sozializazio formak—estigmatizatuz eskubide sozialekin amaitzea da.

Ez da honelako murrizketak aplikatzen dituzten lehen aldia. Azken urteetan babes sozialaren aurkako erasoak asko eta gogorrak izan dira. Kopuruak murriztuz, 2012ko aurrekontuetatik ezarritako %7ko murrizketa bezala, prestazio hauek jasotzeko bete beharreko baldintzak handituz (DSBE/EPO/AES) edo, duela gutxi bezala, Soldata Minimo Interprofesionalaren %8ko igoera ez aplikatuz Lanbidek gestionatzen dituen prestazioetan.

Aipatutako murrizketen bidez babes sozialerako sistema desegiten ari dira. Sistemak geroz eta pertsona gutxiago babesten ditu eta prestazio geroz eta baxuagoekin. Horregatik diogu honen atzean politika eta pertsona zehatz batzuk daudela. Patronala, lan erreforma baliatzen ari da lan baldintzak kaskartzeko, eta honela pobre gehiago sortzen ari da. Eremu politikoan, babes soziala murriztu eta desegiten ari diren horiek, hartzaileak kriminalizatzen dituzten horiek, pobrezia betikotzen ari dira.

Eusko Jaurlaritza, berau sostengatzen duten alderdiak, euren aliatu politikoak eta Beatriz Artolazabal Sailburuak berak ahaztu egiten dute Euskal Herrian pobrezia existitzen dela eta bizi baldintzen prekarizazioa areagotzen ari den egitate bat dela, ez asmaturiko kontu bat.

Herritarren multzo handi batek, handiegia den multzo batek, ez ditu errekurtso ekonomiko nahikoak ongizate maila minimoa eskuratzeko. Herritar hauek ez dira kriminalak, baldintza kaxkarretan bizirauten duten herritarrak dira. Eta halaxe baieztatzen dute Eusko Jaurlaritzak duela gutxi pobreziari buruz egindako inkestaren datuek.

Era berean, lan baldintzetan areagotzen ari den prekarizazio egoerak arrakala soziala eta langile pobreen kolektiboa handitu ditu. Kolektibo honetan sartzen dira enplegua eduki arren, ongizate maila duina bermatzeko diru-sarrera nahikorik ez duten herritarrak, prestazio sozialak eskatzera behartuak daudenak. Zehazki, 12.321 pertsonek osatzen dute kolektibo hau, RGI-a jasotzen dutenen %20. Bestalde, 15.706 pentsionistek ere euren pentsioa RGI-arekin osagarritzen dute, jasotzaileen %30. Hortaz, datuak eskuan, RGIa jasotzen dutenen %50arentzat arazoa diru-sarrera baxuak eskuratzea da, ez lanik egin nahi ez izatea.

Pobrezia ez da krisiaren ondorio naturala, ez horixe! Lan baldintzen kaxkartzeak eta zerbitzu publikoen eraispenak politika neoliberalen logika zein helburuei erantzuten die. Politika neoliberalekin, pobrezia hedatzen den bitartean, Confebask, Petronor, Iberdrola, konstruktora edota Kutxaban-en irabaziak handitzen ari dira.

DSBE-aren erreformaren aurrean (Diru-sarrerak bermatzeko eta Inklusio Sozialari buruzko, abenduak 23ko 18/2008 Legea da erreformatu nahi dutena), pobreziarekin, behingoz, amaituko duen lege berria aldarrikatzen dugu eta pobrezia egoeran sakontzen duten murrizketak etetea. Egoerari buelta eman eta beharra duen inor DSBE gabe ez gelditzea da erronka.

Lan pobreziari eta bizitza prekarioei aurre egiteko alternatiba badugu, Babes Sozialerako sistema propio publiko duin eta kalitatezkoa, hain zuzen ere. Bizi proiektu aske zein autonomoa egingarria egingo duen sistema, prestazioak eta kalitatezko zerbitzu publikoak bermatuko dituen sistema. Aldarrikatzen dugun erreformak hori bermatu beharko luke eta horregatik irten gara gaur kalera, Lanbide eta Eusko Jaurlaritzako bulegoetan mobilizazioak eginez.

MURRIZKETAN AURREAN, EGOERARI BUELTA EMAN ETA EMERGENTZIA SOZIAL ZEIN POBRETZE EGOERA OROKORTUARI AURRE EGITEKO, MOBILIZAZIOAREN ALDEKO APUSTUAN BERRESTEN GARA.

Bilbon, 2017ko ekainaren 14an

Eta hauek dira testimonio batzuk:

Kategoriak Uncategorized | Erantzunak desaktibatuta daude ESKUBIDE SOZIALEN ALDE KALERA IRTEN GARA ETA KALEAN JARRAITUKO DUGU sarreran

ESKUBIDE SOZIALEN ALDE, BABES SOZIALERAKO SISTEMA PROPIO BATEN ALDE. MURRIZKETEI EZ! POBREZIARI EZ!

Murrizketen bidez babes sozialerako sistema desegiten ari dira. Sistemak geroz eta pertsona gutxiago babesten ditu eta prestazio geroz eta baxuagoekin. Horregatik diogu honen atzean politika eta pertsona zehatz batzuk daudela. Patronala, lan erreforma baliatzen ari da lan baldintzak kaskartzeko, eta honela pobre gehiago sortzen ari da. Eremu politikoan, babes soziala murriztu eta desegiten ari diren horiek, hartzaileak kriminalizatzen dituzten horiek, pobrezia betikotzen ari dira.

Eusko Jaurlaritza, berau sostengatzen duten alderdiak, euren aliatu politikoak eta Beatriz Artolazabal Sailburuak berak ahaztu egiten dute Euskal Herrian pobrezia existitzen dela eta bizi baldintzen prekarizazioa areagotzen ari den egitate bat dela, ez asmaturiko kontu bat.

Pobrezia ez da krisiaren ondorio naturala, ez horixe! Lan baldintzen kaxkartzeak eta zerbitzu publikoen eraispenak politika neoliberalen logika zein helburuei erantzuten die. Politika neoliberalekin, pobrezia hedatzen den bitartean, Confebask, Petronor, Iberdrola, konstruktora edota Kutxaban-en irabaziak handitzen ari dira.

MURRIZKETAN AURREAN, EGOERARI BUELTA EMAN ETA EMERGENTZIA SOZIAL ZEIN POBRETZE EGOERA OROKORTUARI AURRE EGITEKO, MOBILIZAZIOAREN ALDEKO APUSTUAN BERRESTEN GARA

EKAINAK 14 MOBILIZAZIOAK BILBON ETA DONOSTIAN
BILBO: 10.30 MAZARREDOKO LANBIDEN
DONOSTIA: 11:30 EUSKO JAURLARITZA DELEGAZIOAN

Kategoriak Uncategorized | Erantzunak desaktibatuta daude ESKUBIDE SOZIALEN ALDE, BABES SOZIALERAKO SISTEMA PROPIO BATEN ALDE. MURRIZKETEI EZ! POBREZIARI EZ! sarreran

CETA eta TTIPen inguruko Mahai Ingurua Getarian

Euskal Herriko Eskubide Sozialen Kartak antolatu du Mahai Inguru hau Gazte Asanbladarekin batera.
Parte hartuko dute EHBilduko Josu Juaristik eta EAJ-PNVko Luke Uribe-Etxeberria. Modetrailea Argiako kazetaria den Unai Brea

Kategoriak Uncategorized | Erantzunak desaktibatuta daude CETA eta TTIPen inguruko Mahai Ingurua Getarian sarreran

Gari Zimmer GUE/NGLko lehendakariari Euskal Herriko Eskubide Sozialen Kartaren ale bat eman diogu

GUE/NGLk antolatuta, Europako etorkizunari buruzko nazioarteko jardunaldiak egiten ari
dira Donostiako Tabakaleran egunotan, “The Left discusses Europe´s future”
izenburuarekin. Besteak beste, migrazioa eta errefuxiatuak, euskal bake prozesua,
lankidetza, industrializazioa eta arrakala soziala bezalako gaiak ari dira lantzen.
Testuinguru honetan, Euskal Herriko Eskubide Sozialen Kartaren ordezkariek kartaren ale
bat eman diote Gabi Zimmer GUE/NGLko lehendakariari. Edurne Larrañaga eta Mikel
Noval izan dira Kartaren ordezkariak.

Euskal Herriko Eskubide Sozialen Karta egungo egoera sozioekonomikoa eraldatzeko xedez
sortutako tresna da eta natura zein pertsonak erdigunean izango dituen eredu sozial berri baten
ardatzak biltzen ditu; oinarrizko eskubide sozialak, hain zuzen ere. Hauxe da Gabi Zimmerri
azaldutakoa, kartaren ale bat ematerakoan. Euskal Herrian burujabetza prozesu bat martxan
jartzen ari garela jakinarazi diogu, eraldaketa soziala gauzatzeko bidean.

Ezberdinen arteko aliantzen eta mobilizazio sozialaren beharraz hitz egin dugu, eta alternatibak
lantzen ari garela nabarmendu dugu. Alternatiben Herria dinamika kokatu dugu hor.

Hauxe izan da gure interbentzioa:

Lehenik eta behin, eskerrak eman nahi dizkiogu GUE-NGL talde parlamentarioari gaurko saiora gonbidatzeagatik. Guretzat aukera paregabea da EH-ko aldaketa sozialaren aldeko mugimenduaren eta Europako Parlamentuan eraldaketan alde lan egiten duzuenon arteko zubiak eraikitzeko. Labur bada ere, Euskal Herriko eskubide sozialen Karta aurkeztu eta partekatu nahi dugu zuekin guztiekin. Mikel eta biok Kartaren Koordinazio Nazionaleko kideak gara, eta guztion izenean, eskerrik asko!

EHESK egungo egoera sozioekonomikoa eraldatzeko xedez sortutako tresna da eta natura zein pertsonak erdigunean izango dituen eredu sozial berri baten ardatzak biltzen ditu, oinarrizko eskubide sozialak, hain zuzen ere.

Krisialdiak gogorren jo zuen garaian, 6 greba orokor egin ziren EH-an eta 2012an egindako azkenak bi berezitasun izan zituen, Kartaren sorrera prozesuan klabeak izan zirenak: bata, greba ofentsiboa izan zela, eredu berri baten aldeko greba orokorra, eta bestea euskal gehiengo sindikalarekin batera, eragile sozialak izan zirela deitzaile. Testuinguru horretan, hausnarketa eta eztabaida ugariren ondoren, mugimendu sozio-sindikalaren Asanblada Nazionala deitu genuen. Bertan erabaki zen Herri gisa ariketa bat egin behar genuela nahi eta behar dugun eredu sozial berria adosteko eta adostasun horren baitan prozesu sozial bat abiatu behar genuela.

Euskal Herriko eskubide sozialen Kartak ardatz horiek bildu eta tresna bilakatu da prozesu sozialean aurrera egiteko. Egungo sistema eraldatzea da gure helburua, politikaren lehentasunak eraldatu nahi eta behar ditugu. Kapitalaren interesak alboratu eta bizi dugun emergentzia soziala gainditzeko, herritarron zein naturaren interesek gidatu behar dute politika.

Euskal Herrian burujabetza prozesu bat martxan jartzen ari garela/ dagoela, erabakitzeko eskubidea oinarri izango duena eta horretan ere gure ekarpena egiten ari gara. Batetik, burujabetza mikroan eta makroan ulertzen dugu. Gure herriaz kapitalak hartzen dituen erabakiek gure gorputzetan edota eguneroko bizitzan ere dute eragina eta erabakitzeko eskubide osoa eskatzen dugu, muga bakarra herritarrok demokratikoki adierazitako borondatea izanik. Bestetik, burujabetza prozesua eraldaketa sozialarekin lotzen dugu ezinbestez, txanpon beraren bi aldeak dira, banaezinak eta elkarri eragiten diotenak. Azkenik, egungo eredua eraldatzea posible dela konbentzituta gaude, alternatibak badaude eta alternatiba horiek errealitate bilakatzea burujabetza ariketa demokratikoa dela uste dugu.

Gaurko eskenatokia aprobetsatuz, guretzat estrategikoak diren 4 gako partekatu nahi ditugu zuekin guztiekin:
1. Ezberdinen arteko aliantzan oinarrituriko prozesua izatea. Beharrak bultzatuta elkartu ginen eta oraindik ere gehiago izan behar badugu ere, gure bokazioa da aldaketaren aldeko gehiengo soziala artikulatzea, borrokarako espazio eta tresna bat ematea. Lehen esan bezala, une hauetan euskal gehiengo sindikalak, eragile sozial esanguratsuak eta ekonomia sozial eraldatzailearen alde lan egiten duten kooperatiba erreferentziazkoak parte hartzen dugu Kartan.
2. Mobilizazio soziala ezinbestekoa da politikaren lehentasunak eraldatzeko. Bide horretan, mobilizazioa ardatz duen prozesu iraunkorra ari gara sustatzen. Horren adibide dira
◦ bizitza ona bermatzeko fiskalitate justu baten alde bihar Bilbon burutuko dugun giza katea,
◦ aurrekontu sozial, burujabe eta partehartzaileen alde Iruñea zein Gasteizen eginiko mobilizazio jendetsuak,
◦ babes sozialerako sistema publiko propioaren alde ekainean zehar burutuko ditugun mobilizazioak.
3. Mobilizazioa, ordea, ez da nahikoa eta eredu berriaren ardatzak gaurdanik landu, sozializatu eta jendartearen gehiengoarekin partekatu behar ditugu. Eredu berriaren logikan guretzat estrategikoak diren hainbat lan ildo landuz, besteak beste elikadura burujabetza eta politika publikoak edota Kontsumo eredu berri baten aldeko Dekalogoa sortzeko erronka.
4. Arestian esan bezala, egungo sistema eraldatzen lagunduko duten eta eredu berri baten logikan kokatzen diren alternatibak badaude. Eragile sozial, sindikal eta kooperatiba ugari horretan daude eta Kartak ere egitasmo hauei bultzada eman behar dio, burujabetza sozialaren beharrarekin lotuz. Guretzat erregaia izan den ekimen bat aipatu nahi dugu:
◦ Alternatiben Herria:
▪ Coop21-aren testuinguruan, “klima aldatu, ez sistema” lemapean Alternatiba egunak egiteko deialdia egiten da. Deialdi horren aurrean, EH-an erabakitzen dugu eredu soziekonomikoaren alternatiba integrala irudikatuko duen eguna antolatzea. Eta oinarriak Kartan jasotzen diren eskubide sozialak izatea.
▪ Lehen edizioa EH-an Bilbon antolatu genuen eta 10.000 pertsona baino gehiagok parte hartu zuen. Bilbon bestelako eredu sozialaren oinarriak irudikatu genituen
▪ 2018.urteko ekainaren 2an, Iruñean egingo dugu bigarren edizioa. Nafarroan erregimena instituzioetatik kanporatu eta aldaketa

Amaitzeko, BIZITZA BURUJABEA, ESKUBIDE OSOZ!

Kategoriak Uncategorized | Erantzunak desaktibatuta daude Gari Zimmer GUE/NGLko lehendakariari Euskal Herriko Eskubide Sozialen Kartaren ale bat eman diogu sarreran